କାର୍ଯ୍ୟାଳୟଗୁଡ଼ିକରେ ଶତ ପ୍ରତିଶତ ସ୍ୱଚ୍ଛତା ବଜାୟ ରଖିବା ପାଇଁ ମାଲକାନଗିରି ଜିଲ୍ଲା ପ୍ରଶାସନର ଅଭିନବ ପ୍ରୟାସ: ନିଯୁକ୍ତ ହେବେ ସ୍ୱଚ୍ଛତା ୱାର୍ଡେନ*
ମାଲକାନଗିରି,୧୪/୫/୨୬)ପ୍ରତୀକ ସମାଚାର - ସରକାରୀ କାର୍ଯ୍ୟାଳୟଗୁଡ଼ିକରେ ସ୍ୱଚ୍ଛତା, ପରିମଳ ଏବଂ ଉପଯୁକ୍ତ ରକ୍ଷଣାବେକ୍ଷଣ ବ୍ୟବସ୍ଥାକୁ ସୁଦୃଢ଼ କରିବା ଉଦ୍ଦେଶ୍ୟରେ ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଏକ ସଂସ୍କାରମୂଳକ ଓ ସ୍ଥାୟୀ ପଦକ୍ଷେପ ଗ୍ରହଣ କରାଯାଇଛି। ଜିଲ୍ଲାପାଳ ଓ ଜିଲ୍ଲା ମାଜିଷ୍ଟ୍ରେଟ୍ ପ୍ରଥମେଶ ଅରବିନ୍ଦ ରାଜଶିର୍କେ ଙ୍କ ଦ୍ଵାରା ଜାରି ଏହି କଡ଼ା ନିର୍ଦ୍ଦେଶନାମା ଅନୁଯାୟୀ, ଜିଲ୍ଲାର ପ୍ରତ୍ୟେକ ସରକାରୀ କାର୍ଯ୍ୟାଳୟରେ ଏଣିକି ଜଣେ ଦାୟିତ୍ୱବାନ ଅଧିକାରୀଙ୍କୁ ସ୍ୱଚ୍ଛତା ୱାର୍ଡେନ ଭାବେ ମନୋନୀତ କରିବା ବାଧ୍ୟତାମୂଳକ କରାଯାଇଛି। ଉକ୍ତ ନିର୍ଦ୍ଦେଶ ଅନୁସାରେ, ସମ୍ପୃକ୍ତ କାର୍ଯ୍ୟାଳୟର ମୁଖ୍ୟଙ୍କ ଦ୍ୱାରା ମନୋନୀତ ଏହି ଅଧିକାରୀ ଜଣକ ସମ୍ପୂର୍ଣ୍ଣ କାର୍ଯ୍ୟାଳୟ ପରିସରର ସ୍ୱଚ୍ଛତା ଏବଂ ଦୈନିକ ପରିମଳ ବ୍ୟବସ୍ଥା ସୁନିଶ୍ଚିତ କରିବା ପାଇଁ ମୁଖ୍ୟ ନୋଡାଲ ଅଧିକାରୀ ଭାବେ କାର୍ଯ୍ୟ କରିବେ। ପ୍ରଶାସନିକ ସ୍ତରରେ ଏହି ବ୍ୟବସ୍ଥାର ସଫଳ ରୂପାୟନ ପାଇଁ ମନୋନୀତ ସମସ୍ତ ୱାର୍ଡେନଙ୍କ ନାମ, ପଦବୀ ଏବଂ ଯୋଗାଯୋଗ ନମ୍ବର ତୁରନ୍ତ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଅବଗତ କରିବା ପାଇଁ ନିର୍ଦ୍ଦେଶ ଦିଆଯାଇଛି, ଯାହାଦ୍ୱାରା ଜିଲ୍ଲା ସ୍ତରରୁ ଏହାର ନିୟମିତ ସମନ୍ୱୟ ଓ ତଦାରଖ କରାଯାଇପାରିବ।ଏହି ସ୍ୱତନ୍ତ୍ର ପଦକ୍ଷେପର ମୂଳ ଲକ୍ଷ୍ୟ ହେଉଛି ପାରମ୍ପରିକ ଓ ସାମୟିକ ସଫେଇ ଅଭିଯାନ ବଦଳରେ ସରକାରୀ ବ୍ୟବସ୍ଥା ମଧ୍ୟରେ ଏକ ସ୍ଥାୟୀ ପ୍ରଶାସନିକ ଢାଞ୍ଚା ପ୍ରସ୍ତୁତ କରିବା। ସଫେଇ କାର୍ଯ୍ୟକୁ କେବଳ ଚୁକ୍ତିଭିତ୍ତିକ କର୍ମଚାରୀଙ୍କ ଉପରେ ନିର୍ଭର ନକରି, ଜଣେ ଉଚ୍ଚପଦସ୍ଥ ଅଧିକାରୀଙ୍କୁ ସିଧାସଳଖ ଦାୟିତ୍ୱ ପ୍ରଦାନ କରାଯିବା ଦ୍ୱାରା ସରକାରୀ ସ୍ତରରେ ପ୍ରଶାସନିକ ଉତ୍ତରଦାୟିତ୍ୱ ଏବଂ ଆନ୍ତରିକତା ବହୁଗୁଣିତ ହେବ। ଜିଲ୍ଲା ପ୍ରଶାସନ ପକ୍ଷରୁ ସ୍ପଷ୍ଟ କରାଯାଇଛି ଯେ, ଶୃଙ୍ଖଳିତ ପ୍ରଶାସନିକ ପରିବେଶ ଏବଂ ସ୍ୱଚ୍ଛ ପରିବେଶ ହିଁ ଉତ୍ତମ ସେବାର ମୂଳଦୁଆ। ସରକାରୀ କାର୍ଯ୍ୟାଳୟ ପରିସର ସ୍ୱଚ୍ଛ ରହିବା ଦ୍ୱାରା ଜନସାଧାରଣଙ୍କୁ ଉନ୍ନତ ଓ ଶୃଙ୍ଖଳିତ ସେବା ମିଳିବା ଦିଗରେ ସହାୟକ ହେବ। ସରକାରୀ କାର୍ଯ୍ୟାଳୟ ଗୁଡ଼ିକ ନିଜେ ଏକ ଆଦର୍ଶ ପରିବେଶ ସୃଷ୍ଟି କରି ସମାଜ ପାଇଁ ଦୃଷ୍ଟାନ୍ତ ସ୍ଥାପନ କରିବା ଏହି ପଦକ୍ଷେପର ମୁଖ୍ୟ ଅଭିପ୍ରାୟ।
What's Your Reaction?
Like
0
Dislike
0
Love
0
Funny
0
Angry
0
Sad
0
Wow
0
